सहस्र किरणहरुमा
दासताको विष भरेर
लाखौँ ताराहरूलाई गिज्याउँदै
अँध्यारोको साम्राज्यसित
यो धरतीको उज्यालो साट्ने
सम्झौता गर्दैछ
एउटा सूर्य
महासय ! यो गद्दारीवेशन हो; महाधिवेशन हुनै सक्दैन !!

भित्र्र्याउँदै घातक
बहुराष्ट्रिय कार्वनडाइअक्साइड
आफ्नै सञ्जीवनीको
अथाह र स्वच्छ अक्सिजन
आवधिक रूपमा
आणविक हतियारको कारखानातिर
खुलेआम बुझाइरहेछ
एउटा बूढो रुख
महासय ! यो दलालीवेशन हो; महाधिवेशन हुनै सक्दैन !!

बर्साैँवर्ष
मान्छेहरूका आँखा, जिभ्रो र पेटमा
डस्दाडस्दै मर्न पुगेका
भयानक विषालु सर्पहरू
फेरि बौरेर
एकजुट भई जोत्ने कोसिस गर्दैछन्
मान्छेहरूकै छातीमा
एउटा नृशंस हलो
महासय ! यो अपराधिवेशन हो; महाधिवेशन हुनै सक्दैन !!

ठिँगुर्याउँदै सपनाका मुनाहरू
दुर्गन्धित सिनोमा
दाँत गाडिरहेछ हँसिया
वर्गशत्रुको टेबिलमा
वीभत्स रसको गिलाँससित
’चेयर्स’ गरेपछि
ठाउँ कुठाउँ बज्रिरहेछ हथौडा
र, पनि भनिरहनेछन् ती,
“किसानसितै छ हँसिया“
“मजदुरसितै छ हथौडा“
महासय ! यो भ्रान्तिवेशन हो महाधिवेशन हुनै सक्दैन !!

आउनुहोस् !
हाम्रा जीवन र सपनाका हत्यारा ’महाधिवेशन’हरूको
सख्त खारेजीको घोषणा गरौँ !!!

(मकवानपुर)