सबथोक गुमाएँ ममाथि भगवानको ज्यादती बढ्यो
तिमी उत्सव मनाऊ तिम्रो त खुसीमा, खुसी बढ्यो !
ठुलो सभाको माझमा उसलाई चिन्दिनँ भनेकी थेँ,
यता मुटुलाई असर परेछ एकाएक ढुकढुकी बढ्यो ।
साहुजी! हेर्नुस् त त्यो मान्छे आधा मुटु बोकेर हिँडेछ
ठिक छ बाबु मेरो भट्टीमा एक अर्को अम्मली बढ्यो ।
कोही नयाँ मान्छे आएजस्तो छ उसको जिन्दगीमा
हिजोसम्म सुमधुर चलेको सम्बन्धमा दुरी बढ्यो !
'समृद्ध नेपाल सुखी नेपाली' भनेको यही त होला,
दिनानुदिन रोग बढ्यो, भोक बढ्यो, गरिबी बढ्यो!
