अन्त्य गङ्गाजिको भेट्न सक्दिनँ म ।
घाँटी विश्वासको रेट्न सक्दिनँ म ।
के तितो हुन्न र ओखतीको रस ?
दूधले तिर्सना मेट्न सक्दिनँ म ।
सक्छु छोप्नै यहाँ कर्म यी तैपनि,
हातले सूर्यचैँ छेक्न सक्दिनँ म ।
जोसुकैले गरुन् जेसुकै धर्तिमा,
मूल्यको मर्ममा खेल्न सक्दिनँ म ।
लड्छु उस्तै परे युद्धमा यद्यपि,
युद्ध तिम्रासँग थेग्न सक्दिनँ म ।
गर्दछन् हेलना छेउका 'तीर्थ' कै
भित्रकै देउता हेप्न सक्दिनँ म ।
(बैतडी)
