कोही हाहाकार गरिरहेका छन्
कोही जयजयकार गरिरहेका छन्
हाहाकार र जयजयकारको घेराभित्र
एउटा खुकुरी सम्मेलन
भुत्ते र धारिला खुकुरीहरूको सम्मेलन 
उद्घाटित छ,
रहस्यमय, अन्त्योन्मुख ।

भुत्ते खुकुरीहरू घाँस रेट्न थाल्छन्
जाँगर छ तर शक्ति छैन 
धारिला खुकुरीहरू, 
भुत्ते खुकुरीको परिश्रमको खिलाफमा खित्का छोड्न थाल्छन्
भुत्ते खुकुरीहरू रिसले आगो भएका छन्
रिसको झोंकमा झन छिटो छिटो रेट्छन्
झन् भुत्ते झन् भुत्ते
यस्तै छ यिनीहरूको आलिङ्गन
रहस्यमय अन्त्योन्मुख कम्मेलन ।

धारिला खुकुरीहरूको खित्का बढ्दो छ
आदर्शहीन खित्का 
खिस्याउनु नै उसको आदर्श हो
बढ्दो छ उसको अट्टहास,
वर्गीय अट्टहास 
ऊ वर्गभित्र वर्ग खोज्छ 
लाग्ने हुनुको गर्वको रापले 
ऊ झन् तातिएको छ 
ऊ झन् मात्तिएको छ 
यस्तै छ उनीहरूको विश्वमान
रहस्यमय अन्त्योन्मुख सम्मेलन ।

रविकिरण बिदा माग्दो छ
उषाकालीन सन्नाटा बिरक्ती र होहल्ला हुँदै
सन्ध्या आह्वान गरिरहेकी छन् 
दर्शकदीर्घा ब्यस्त छ 
कोही धार हाल्दा छन् 
(रेट्तारेट्ता बोधिएका धारहरू)
कोही बिँड बटुल्दा छन्
(वर्गीय टकरावले फुटेर छरिएका बिँडहरू)
दिन ढल्किँदै जॉदा 
निष्कर्षहीन बन्ने खतरा बढ्दै गरेको
यी खुकुरीहरूको सम्मेलन
रहस्यमय अन्त्योन्मुख सम्मेलन ।

(उदयपुर)