कति कथाहरू लेखिए
र कति कथाहरू अलिखित छन् !
°°°
जब पेटमा आगो सल्किएर
भोकको डढेलो दनदनी बल्न थालेथ्यो
तब निस्किएथ्यो
सडकभरि रामापिथेकसको आदिम जुलुश !
°°°
जब बाहुबल रित्तिएर
ढल्न थालेथे— शासकका लुटेरा दरबारहरू
तब पाखण्डताको बर्को ओढेर
ईश्वरको भ्रम छर्दै निस्किएथ्यो— धर्मको जुलुश !
°°°
जब भ्रमको जालो च्यातेर
सुटुक्क उदायो— धर्तीमा चैतन्य घाम
तब प्रेमको चिराक बोकेर
जीवनको गीत गाउँदै निस्किएथ्यो— विज्ञानको जुलुश !
°°°
जब छातीमा देश दुखेर
उदाएथ्यो आकाशमा बलिदानको इन्द्रेणी
तब सहिदको आलो रगत पिएर
मृत्युको धुन बजाउँदै निस्किएथ्यो— कटुवाल जुलुश !
°°°
र आज पनि
हजारौं फूलको सपना लुटेर
हिँनहिँनाइरहेछ— गणतन्त्रको अघोरी बाबा
प्रभुको कृपा थापेर
ऊ लगातार गरिरहेछ संविधानको बलात्कार !
ठिक यो बेला,
पिल्स र कण्डमका प्याकेट बोकेर
कोठीतिर हिँडिरहेछ हनुमानहरूको राष्ट्रीय जुलुश !
°°°
यतिखेर,
म पनि लगातार हिँडिरहेछु
आवाजविहीन बम बनेर जुलुश पछिपछि !

(झापा)