जति बेला त्यो रकेटले मलाई मार्यो
म फूल रोपिरहेको थिएँ !
मेरो बाजे भन्ने गर्नु हुन्छ
वहाँको बाबुले
यो धरतीमा
धेरै सुन्दर फूल देख्नुभएको थियो ।

अब त्यो ठाउँमा
इज्रायली रकेटको टुक्रा उम्रेको छ
जसको पछाडिपट्टि लेखिएको छ
यू. एस .ए .।

मलाई
फूल एति धेरै मन पर्थ्यो कि
म ठूलो भएपछि माली बन्न चाहन्थेँ
धरतीमा फूल सजाउने माली !

त्यो समय पनि म फूल नै रोप्दै थिएँ
मेरी बहिनीले
रकेटको त्यस टुक्रालाई
माटोबाट तानेर
काँडेदार तारको उतापट्टि फ्याँकेकी थिइन्
र खितिति हाँसेकी थिइन्
मेरो एउटा साथी
धरती फुटाएर निस्केको
अर्को एउटा फूललाई हेरेर
खुसीले बेस्सरी उफ्रेको थियो ।

अर्को एउटा साथी
नजिकै उभिएको थियो
परेवा आकासमा उडिरहेको थियो !
ठीक त्यही समयमा
त्यो रकेट हामीतिरै आएको थियो
र हामी सबै मारियौँ
म, मेरी बहिनी, मेरो साथी, परेवा
र त्यो फूल पनि,
जुन धरती फुटाएर बाहिर निस्केको थियो ।

तर त्यो मैले रोपिरहेको बिरुवा
उछिट्टिएर पर पुगेर झर्यो ।

त्यसलाई
मेरो अर्को साथीले फेरि रोपिरहेको छ
उसकी बहिनी
सहयोगको लागि
दौडेर आउँदै छिन !

(अनु- बलराम तिमल्सिना)