उनीहरूसँग
अब आदर्श छैन
मरिसकेको छ त्यो
कुनै दिन उनीहरुको आदर्शलाई हेरेर
मुग्ध हुने मानिस म पनि हुँ
मुग्ध भएर लेखेको डायरीको पाना
अहिले पनि सुरक्षित छ मसँग
उनीहरुको आदर्शलाई हेरेर
मैले पनि प्रेम गर्न सिकेको हुँ
आदर्शलाई ।

देशालाई, सङ्‌घर्षलाई, परिवर्तनलाई
प्रेम गरेको देखेर
कुनै दिन भावविभोर भएको हुँ म
अहिले पनि सम्झना छ मलाई
त्यस बखत खसेको आँसुको
आँखाको सिरानीबाट एउटा सुन्दर अतीत
अहिले पनि हिँडेर ओझेल हुन्छ बेलाबखत
र छातीभित्र गर्वको हिमाल उठ्छ ।

अब उनीहरूसँग आदर्श छैन, सत्ता छ
सत्ताका कक्षहरूमा
खरानी भएको अतीतका अवशेषहरू छन्
अवशेषको के अर्थ हुन्छ र
बढीमा
सम्झेर रुन सकिन्छ
एउटा सुन्दर अतीतको मृत्युमा
शोक मनाउन सकिन्छ
मनुष्यको मृत्युमा जस्तै ।

अब उनीहरु बदलिएका छन् व्यापारीमा
नाफाघाटाको हिसाब छ उनीहरुसँग
निर्वस्त्र उभिएका छन् उनीहरु बिच सडकमा
यो लोकतन्त्र हो या फोहर राजनीतिको शौचालय
खुट्‌याउन कठिन छ यतिबेला
अब आदर्श छैन, बस् आदर्शका हत्याराहरु छन् !

(दाङ)