काठमाडौं । प्रवासमा बसेर नेपाली कलासाहित्यकाे निरन्तर सेवा गरिरहेका साहित्यकार कृष्ण बजगाईंको नियात्रा ‘दाइबुचु’ सार्वजनिक भएको छ । साउन एघारमा लन्डनस्थित कवि विलियम वर्डस्वर्थको निवास ग्रासमेरमा उनी स्वयम्ले उक्त कृतिको लोकार्पण गरेका हुन् ।
उनको यो कृति जापान यात्रा क्रममा उनले भोगेका अनुभूतिको सङ्गालो हो । जसमा जापानको संस्कृति, धर्म, कलासाहित्य र इतिहासलाई समेटिएको छ । नियात्रा लेखनका शिद्धहस्त साहित्यकार बजगाईंको यो कृति एघारौँ कृति हो । जसलाई शिखा बुक्स काठमाण्डौले प्रकाशन गरेको हो ।
डायस्पोरामा लामो समयदेखि बसोबास गरिरहेका बजगाईँ साहित्य सिर्जना र साहित्यिक सङ्घसंस्थामा उतिकै सक्रिय छन् । समकालीन साहित्य प्रतिष्ठान बेलायतका संस्थापक अध्यक्ष रहेका बजगाईँ विगत तेह्र वर्षदेखि समकालीन साहित्य डट कम नामक वेब पत्रिकाको सम्पादन तथा प्रकाशन गर्दै आएका छन् । उनी बेलायतबाट प्रकाशित हुने नेपाली भाषाको अन्तर्राष्ट्रिय साहित्यिक जर्नल ‘प्रवासन’का प्रधान सम्पादक पनि हुन् ।
