(१)

जुन भाँडोमा हाल्यो पानीको उस्तै आकार हुन्छ
यौन पिपासुलाई आँसुको हैन मासुको बजार हुन्छ
कुरा मात्र ठूला आदर्श प्रेम र समर्पणका
व्यवहारमा लमतन्न सुत्नु उनीहरुको संसार हुन्छ ।

(२)

मेरो पीडाको साक्षी एक मात्र अनिदो रात र सिरानी छ
त्यही अन्धकारमा घातकै अध्याँरो छ कालो कहानी छ
त्यसैले लेख्यो वीभत्स कथा मेरो जीवनको यहाँ
आफ्नो थियो अस्तायो उपरान्त नउदाउने विहानी छ ।


(३)

सहनु पर्छ लेखिएको भोग्नु पर्छ बस हुन्न तकदिर यहाँ
अँध्यारो रात भए छाया पनि भाग्छ छाडेर शरीर यहाँ
जगतको नियम हो यो कोही कसैको हुँदैन कहिल्यै
नजाने कति झरे होलान् आँसु खै र बगेको पीर यहाँ ।

(४)

जल विहार गर्न मिल्ने कागजको नाउ हुँदैन
झुम्राको पुतलीमा भावनाको कुनै भाऊ हुँदैन
भुराभुरीको खेल न हो क्षणभरको रमाइलो
कागज र झुम्राको खेलौनाले कोही साहु हुँदैन ।

(५)

जल्नेहरु जल्दै गर्छन् जल्नेहरुलाई जल्न देऊ
डाहा गरी कपट गर्ने छल्न खोज्छन छल्न देऊ
कसको चल्छ हुर्मत यहाँ तिम्रो मेरो समर्पणमा
खरानी ती आफै हुन्छन् बल्नेहरुलाई बल्न लेऊ ।

सिन्धुपाल्चोक-चौतारा