मंगल ग्रहमा जीवनको संभावना देख्ने
ए सभ्य देशका सभ्य मानिसहरु
अनन्ताकाशमा सोझ्याइएको दुरवीनलाई
एकपटक हाम्रो वस्तीतिर फर्काएर त हेर
यहाँ पनि छ जीवनको संभावना
ए प्रजातन्त्रवादीहरु,
ए फस्ट वल्र्डका भलाद्मीहरु
भो, अव छोडीदेउ मान्छे जस्तै रोबोटहरु वनाउन
रोबोट जस्तै त छन् नि आजकलका मान्छेहरु पनि
तिमीहरु जीवन खोज्छौ,
यहाँ थुप्रैले जीवनको विकल्प खोज्छन्
अनि मृत्यु रोज्छन्
तिमीहरु मंगल ग्रहसम्म पुगेर किराफट्यांग्रा र मुसा खोज्छौ
केही नपाए व्याक्टेरीया खोज्छौ
जीवनको पुरापुर सम्भावना भएको यस ठाउँमा भने
साक्षात् मानव जीवनहरुलाई पनि जीउने वातावरण नै छैन
यहाँ आउन तिमीलाई कुनै अन्तरीक्ष यान पनि चाहिँदैन
यहाँ जीवन देख्न तिमीलाई कुनै दुरबीन पनि चाहिँदैन
यहाँ आएर त हेर
यहाँ कति कति छन् जीवनका सम्भावनाहरु ।
(पोखरा)
