प्राचीनदेखि चलिरहेको घडीले
अहिलेसम्म समय देखाएको छैन ।

सम्बन्ध जोडेर सिन्दुरसँग
सृष्टि चलाइरहँदा पहाड बोकेर पाठेघरमा
समानताको घडीले समय देखाएको छैन ।

आकाशमुनि आकाशलाई नै छानो बनाएर
फोहोरसँग भोक साटेर धडकिन्छ मुटु
भाग्यमा चल्न खोजेको घडीले
समय देखाएको छैन सडक छेवैमा ।

परदेश गएका सन्तान
फर्किएका छैनन् - जस्तो क्रान्ति फर्किएको छैन
रहरको अन्तिम स्वास जबर्जस्ती
सन्तान देख्नकै लागि घडकिएको छ
पर्खाइको सपना बोकेको घडीले
विपनाको समय देखाएको छैन ।

युद्धको जित कल्पिरहेको सिपाही
सिमानाको फैसला कुरिरहेको जनता
दिनपछि रात बोलाइरहेको आकाश
अन्तिम भेटलाई देखिरहेको प्रेमी
समय देखे आ-आफ्ना सबैले
तर अहिलेसम्म घडीले समय देखाएन ।

भ्रमको घडी बाँधेको समाज
अन्धविश्वासमा आधुनिकता किन्दछ
तिमीले सोच्यौ एकपटक
अहिलेसम्म घडीले किन समय देखाएन ?

(पोखरा, कास्की)