राप्ती साहित्य परिषद् जिल्ला शाखा रुकुम (पश्चिम) को नियमित रचना वाचन कार्यक्रम सम्पन्न भएको छ ।
परिषदले साहित्यिक गतिविधि अन्तर्गत द्वैमासिक रुपमा सञ्चालन हुँदै आइरहेको एकल रचनावाचनको २५ औं श्रृङ्खला साहित्यकार वीरबहादुर केसीको एकल वाचनमा सम्पन्न भएको हो । कार्यक्रम कार्तिक १५ गते राप्ती साहित्य परिषद् जिल्ला शाखा रुकुम (पश्चिम) का अध्यक्ष मनलाल ओलीको अध्यक्षतामा सम्पन्न भएको हो ।
उक्त कार्यक्रमका प्रमुख अतिथि प्रगतिशील लेखक संघ नेपाल कर्णाली प्रदेशका अध्यक्ष गिरीप्रसाद बुढा, विशेष अतिथि मुसिकोट खलंगा बहुमुखी क्याम्पसका प्रमुख मुकुन्दप्रसाद शर्मा, अतिथिहरूमा परिषद्का सल्लाहकार तथा त्रिभुवन जनता माध्यमिक विद्यालय खंगाका प्रधानाध्यापक हरिप्रसाद खनाल, परिषद्का सल्लाहकार तथा आहा सञ्चार साप्ताहिकका सम्पादक मेगराज खड्का, नेपाल राष्ट्रिय शिक्षक संगठनका केन्द्रीय उपाध्यक्ष नन्दराम देवकोटा, प्राइम टाइम टेलिभिजनका रिपोटर भरत चन्द, एकल रचना वाचक साहित्यकार वीरबहादुर केसी, राप्ती साहित्य परिषद् जिल्ला शाखा रुकुमका पूर्व सहसचिव समष्टि बुढा, परिषद्का कोषाध्यक्ष प्रमोदकुमार शर्मा, परिषद्का सदस्य एक्कबहादुर केसी लगायतका हुनुहुन्थ्यो ।
परिषद्का कोषाध्यक्ष प्रमोदकुमार शर्माको स्वागत मन्तव्य रहेको सो कार्यक्रममा स्रष्टाको चिनारी साहित्यकार हरिप्रसाद खनालले गराउनु भएको थियो । एकल रचनावाचक साहित्यकार केसीले विभिन्न शीर्षकका १९ ओटा रचना प्रस्तुत गर्नुभएको थियो ।
वाचित रचनाको समीक्षा साहित्यकार मुकुन्दप्रसाद शर्माले गर्नुभएको थियो । परिषद्का सचिव ओमबहादुर खत्रीले सञ्चालन गर्नुभएको सो कार्यक्रममा साहित्यकारहरू एक्कबहादुर केसी, नन्दराम देवकोटा र गिरिप्रसाद बुढाले रचना सुनाउनु भएको थियो ।
