काठमाडौं, १७ भदौ ।
आँबुखैरेनी स्रष्टा समाजले प्रत्येक वर्ष दिँदै आएको दुईवटा राष्ट्रिय पुरस्कार यस वर्ष कोरोना (कोविड–१९)को महामारीको कारण स्थगित भएको छ । २०७० सालमा गठन भएको यस साहित्यिक संस्थाले साहित्यतर्फ ‘आँबुखैरेनी वाङ्मय पुरस्कार’ र हास्यव्यङ्ग्यतर्फ ‘इन्द्रासन हास्यव्यङ्ग्य पुरस्कार’ को स्थापना गरेको थियो ।
‘आँबुखैरेनी वाङ्मय पुरस्कार’ भाषा, साहित्य र कलाको क्षेत्रमा लामो समयदेखि योगदान पु¥याउँदै आएको साहित्यिक व्यक्तित्व तथा वर्षको उत्कृष्ट साहित्यिक कृतिलाई प्रदान गरिँदै आएको छ भने ‘इन्द्रासन हास्यव्यङ्ग्य पुरस्कार’ हास्यव्यङ्ग्य क्षेत्रमा विशिष्ट योगदान पु¥याउँदै आइरहेका लेखक, कलाकार, कार्टुनिष्ट र चित्रकारलाई प्रदान गरिँदै आएको छ । हालसम्म साहित्यतर्फ डिल्लीराम मिश्र २०७१, गोविन्द विनोदी २०७२, बुँद राना २०७३ र भुइँया कृतिका लागि यज्ञशलाई २०७४ सालको ‘आँबुखैरेनी वाङ्मय पुरस्कार’ प्रदान गरिएको छ भने हास्यव्यङ्ग्यतर्फ हास्यकलाकार एवं हास्यलेखक हृदय मिश्रलाई २०७३ र उत्तम केसीलाई २०७४ सालको ‘इन्द्रासन हास्यव्यङ्ग्य पुरस्कार’ प्रदान गरिएको छ । यी दुवै पुरस्कारको राशी जनही रु दश हजारको रहेको छ ।
यसैगरी यस साहित्यिक संस्थाले आँबुखैरेनी क्याम्पसमा स्नातक तहमा उत्कृष्ट अङ्क ल्याउन सफल शिक्षाशास्त्र संकाय र व्यवस्थापन संकायतर्फका एक एक जना विद्यार्थीहरुलाई ‘महेश कुमार श्रेष्ठ प्रतिभा पुरस्कार’ ले सम्मानित र पुरस्कृत पनि गर्दै आइरहेको छ ।
हाल विश्वव्यापी महामारीको रुपमा देखा परिरहेको कोरोना भाइरस(कोविड–१९) बढ्दो सङ्क्रमणको प्रभाव नेपालमा पनि तीब्र रुपमा देखा परिरहेको र यस विषम परिस्थितिलाई ध्यान दिँदै संस्थाले यस वर्ष प्रदान गरिने साहित्यिक पुरस्कार र सबै साहित्यिक गतिविधिहरुलाई सहज परिस्थिति नहुन्जेलका लागि स्थगित गरेको छ ।