१४ भदौ, काठमाडौं ।
वरिष्ठ प्रगतिवादी साहित्यकार एवं प्रगतिशील लेखक संघका पूर्व अध्यक्ष आनन्ददेव भट्टको निधन भएको छ ।
अल्जाइमर रोगबाट पीडित भट्टको भट्टको ८५ वर्षको उमेरमा आज बिहान निधन भएको हो । गत महिना अस्पतालमा उपचारपछि उनी कालिकास्थान निवासमा बस्दै आएका थिए ।
पुर्ख्रौली घर बैतडीको पल्लाचौडली रहेका भट्टले जन्म वि.सं १९९३ मा जुम्लामा भएको थियो ।
राजनीतिक र सांस्कृतिक आन्दोलनमा सक्रिय आनन्ददेव भट्ट प्रगतिशील लेखक संघ (प्रलेस) मा २०१६ मा सहसचिव र २०५८ मा अध्यक्ष भएका थिए । उनी प्रगतिशील प्राध्यापक संघका पूर्वअध्यक्षसमेत हुन् ।
लामो समय नेपाली साहित्य, प्राध्यापन र प्रगतिशील चिन्तनमा सक्रिय भट्टका काव्य, खण्डकाव्य, संस्मरण, समालोचना र निबन्धलगायतका विधाका साढे दुई दर्जनभन्दा बढी कृति प्रकाशित छन् । उनका विशेषगरी ‘साइँलीमैया’, ‘आमा बोलाउँछिन्,’ ‘९७ साल’, ‘अब हिमाल बोल्छ’, ‘जनताको साहित्य’ लगायत कृति लोकप्रिय छन् ।
भट्ट २०७५ देखि बिर्सिने रोग अर्थात् ‘अल्जाइमर्स’बाट पीडित थिए । विरामी अवस्थामै २०७६ फागुन २४ गते उनलाई ‘सार्वजनिक राष्ट्रिय अभिनन्दन’ गरिएको थियो ।
उनको आजै पशुपति आर्यघाटमा अन्त्येष्टि गरिने प्रगतिशील लेखक संघका अध्यक्ष प्रा. डा. जीवेन्द्रदेव गिरीले जानकारी दिए ।
