काठमाडौँ, १४ असोज ।
कवि ढुण्डिराज पोखरेल ‘ज्ञानकुञ्जबाट चिहाउँदा’ नामक कविता सङ्ग्रह लिएर आएका छन् । कवि पोखरेलको उक्त कविता सङ्ग्रह बुधबार प्रज्ञा भवनमा नेपाल प्रज्ञा–प्रतिष्ठानका कुलपति गङ्गाप्रसाद उप्रेतीले लोकार्पण गर्नुभयो ।
सङ्ग्रह लोकार्पणपछि बोल्दै कुलपति उप्रेतीले परिस्थिति जतिसुकै प्रकतिकुल भएता पनि सर्जकलाई त्यसले कुनै असर नगर्ने बरु त्यसले अवसर ल्याउने बताउनु भयो । उहाँले चेतना र इच्छाशक्तिलाई मानिसको उमेरले फरक नपार्ने उल्लेख गर्दै जीवनको सात दशक पार गरेका स्रष्टा पोखरेलद्वारा रचित सृजनाहरू नेपाली कविता साहित्यका लागि तागत भएको विचार व्यक्त गर्नुभयो ।
पुष्पराग साहित्य प्रतिष्ठानका अध्यक्ष डा. यज्ञश्वर निरौलाको सभापतित्वमा सम्पन्न कार्यक्रममा उपन्यासकार शङ्कर भारती र प्रतिष्ठानका महासचिव डा. प्रदीप मैनालीले लोकार्पित कविता सङ्ग्रहका बारेमा बोल्नुभएको थियो । भारतीले पोखरेलको लेखनमा धार्मिक र सांस्कृतिक प्रवृत्ति झल्किएको बताउनुभयो ।
कार्यक्रममा नेपाल प्रज्ञा–प्रतिष्ठानका सदस्य सचिव प्रा. जगत्प्रसाद उपाध्याय, काव्य विभाग प्रमुख प्रा.डा. हेमनाथ पौडेल, पूर्व प्राज्ञ परिषद् सदस्य विष्णु प्रभात, प्राज्ञसभा सदस्य शशी लुमुम्बू लगायतको उपस्थिति रहेको थियो । कार्यक्रम टिएन भट्ट विश्वामित्रले सहजीकरण गर्नुभएको थियो ।
