(L-R) Writer Kumar Nagarkoti, Member of National Human Rights Commission Mona Ansari and writer Yangesh launching the book ‘Bhuiya’ at Nepal Tourism Board, Kathmandu on Sunday, September 3, 2017.
Photo: Bijay Gajmer/Republica/Nagarik
काठमाडौं, १९ भदौ ।
पत्रकार यज्ञशको पुस्तक ‘भुइयाँ’ आइतबार सार्वजनिक भएको छ । मानव अधिकार आयोगकी आयुक्त मोहना अन्सारी, आख्यानकार कुमार नगरकोटी र यज्ञशले संयुक्त रुपमा पुस्तक विमोचन गरेका हुन् ।
फाइन प्रिन्टले प्रकाशन गरेको ‘भुइयाँ’मा लेखकले १२ वटा सामान्य मान्छेका कथालाई पेश गरेका छन्। लेखक कुमार नगरकोटीले पुस्तकको लेखनशैली जीवन्त रहेको बताए। ‘पुस्तकको लेखनशैली जीवन्त छ। ब्याख्यानमा पनि सलल बगेको छ,’ उनले भने, ‘उहाँ कविता लेख्नुहुन्न तर पुस्तकको प्रस्तुति कवितात्मक लाग्छ।’
राष्ट्रिय मानव अधिकार आयोगकी सदस्य मोहना अन्सारीले पुस्तकले आर्थिक, सामाजिक र मानवअधिकारको पक्षलाई उजागर गरेको उल्लेख गरिन्। पुस्तकले सामाजिक आन्दोलनको महत्तालाई पुस्टी गरेको उनले बताइन्। उनले अनुसन्धान विधि सिकाउन पनि यो पुस्तक प्रयोग गर्न सकिन्छ भनिन् । ‘सन्दर्भ सामग्रीका रुपमा त यो पुस्तक हाम्रा समाजशास्त्र विभागहरुमा राखे राम्रो हुन्छ।’ उनको कथन थियो ।
‘सामाजिक न्यायको पाटोमा धेरै काम हुन बाँकी छ । मिडियाले पनि मध्यम वर्गलाई मात्र जोड दिएको छ । त्यसैले तल रहेका मान्छेका कथामाथि लेखेको हुँ ।’ यज्ञशले लोकार्पण कार्यक्रममा भने ।
पुस्तक प्रकाशक फाइन प्रिन्टका अजित बरालले तल्लो वर्गका महिलाहरुका कथाले पाठकको अन्तरमनलाई छुने र हामीले बाँचेको समाजको चित्र प्रस्तुत गर्ने बताए ।
भुइयाँ यज्ञशको तेस्रो कति हो । यसअघि उनले अनुवाद गरेका दुई कृति ‘मोहनदास’ र ‘नेलकटर’ प्रकाशित भैसकेका छन् ।
